Eladio Santos anuncia que o Goberno impulsará a xestión sostible da lousa mediante o Plan de Acción das Materias Primas Minerais
§ Os membros do Clúster expresaron a súa preocupación pola falta de man de obra e o subdelegado facilitoulles os protocolos e procedementos a seguir para a posible contratación de persoal estranxeiro en orixe
Ourense, 18 de xuño de 2025.- O subdelegado do Goberno en Ourense, Eladio Santos, informou hoxe ao Clúster da Pizarra de Galicia de que o Ministerio para a Transición Ecolóxica e o Reto Demográfico impulsará a xestión sostible da lousa e fomentará a industria no sector, como parte das orientacións estratéxicas da folla de ruta con horizonte 2050 que contempla o borrador do Plan de Acción das Materias Primas Minerais 2025-2029.
Así llo trasladou nunha reunión na Subdelegación do Goberno en Ourense, á que acudiron o presidente do Clúster da Pizarra de Galicia, Eliseo López; o expresidente e membro da entidade, Víctor Cobo, e o xerente, Severino González, para expoñerlle ao subdelegado as súas demandas.
No encontro, Eladio Santos explicou que o Ministerio para a Transición Ecolóxica e o Reto Demográfico considera ao da lousa coma “sector estratéxico”, xa que España é o primeiro produtor mundial de lousa. “Un dos núcleos máis importantes na súa produción é o de Valdeorras, polo que o Plan de Acción beneficiará á comarca enteira”, celebrou.
Neste senso, explicou que as orientacións estratéxicas da folla de ruta son buscar a eficiencia e a economía circular nas cadeas de valor do subministro de materias primas minerais; impulsar e consolidar a xestión sustentable das materias primas na industria extractiva; enfocarse na seguridade de subministro e o cumprimento dos requisitos medioambientais, xeoestratéxicos e de xustiza social na importación de materias primas minerais, e fomentar a industria de materias primas minerais de carácter estratéxico para a transición enerxética e dixital.
Tamén aclarou que o borrador do Plan de Acción contempla financiamento para varias actuacións como o aproveitamento de residuos e a recuperación de zonas afectadas pola minaría, entre outras. “Este Goberno está comprometido coa transformación do sector extractivo co obxectivo de protexelo e facelo máis sostible”, destacou o subdelegado.
Falta de man de obra
Por outra banda, o Clúster da Pizarra de Galicia trasladoulle ao subdelegado a súa preocupación pola falta de man de obra no sector. Por iso, Eladio Santos facilitoulles os protocolos e procedementos a seguir para a posible contratación de persoal estranxeiro en orixe. “Este tipo de programas son unha boa solución para dar emprego a xente que o precisa e dotar de man de obra ás empresas que crean riqueza na provincia”, explicou.
